ຍຸງຕ້ອງການນ້ຳຕານເພື່ອດຳລົງຊີວິດບໍ່ແມ່ນເ
ຫຼັງຈາກທີ່ 2-3 ມື້ກ່ອນນີ້ຕອນກຳລັງນັ່ງເບິ່ງໂທລະພາບຢູ່ຫ້ອງ ແລະ ມີແກ້ວນ້ຳທີ່ມີນ້ຳສາລີເຫຼືອຢູ່ໜ້ອຍດຽວ ຫຼັງຈາກນັ້ນພໍແຕ່ວາງແກ້ວລົງປະມານ 5-10 ນາທີ ເຮົາເລີ່ມສັງເກດເຫັນວ່າມີຍຸງມາຕອມຂອບແກ້ວ ແລະ ພາຍໃນແກ້ວປະມານ 3 ໂຕ, ແຕ່ບ່ອນທີ່ເປັນຕາສັງເກດຢູ່ບ່ອນວ່າມັນບໍ່ພຽງແຕ່ຕອມແກ້ວເຮົາພຽງແຕ່ແກ້ວດຽວເທົ່ານັ້ນ ມັນຍັງຕອມແກ້ວທາງຂ້າງອີກ. ຍ້ອນຄວາມຂີ້ສົງໄສກໍບໍ່ຊ້າທີ່ຈະເຂົ້າໄປຄົ້ນຫາໃນ Google ແລ້ວກໍພົບຄຳຕອບວ່າ: ທີ່ຈິງແລ້ວຍຸງມັນຕ້ອງການນ້ຳຕານເພື່ອຄວາມຢູ່ລອດຂອງມັນ ບໍ່ແມ່ນເລືອດຢ່າງທີ່ເຮົາຄິດກັນ. ທຳອິດຄິດວ່າຈະຂຽນປະໄວ້ເປັນຄວາມຮູ້ໃໝ່ຕັ້ງແຕ່ຕອນຮູ້ຄຳຕອບແລ້ວແຕ່ວ່າບໍ່ມີເວລາຫວ່າງເລີຍ.
ອີງຕາມເວັບໄຊ insidescience ໄດ້ກ່າວວ່າ ຈາກການຄົ້ນຄ້ວາວິໄຈຂອງພະແນກກະສິກຳຂອງສະຫະລັດອາເມລິກາທີ່ເພິ່ນກຳລັງສຶກສາກ່ຽວກັບວິທີທາງການວາງກັບດັກ ແລະ ຂ້າຍຸງໂດຍຈັບປະເດັນໄປທີ່ແມ່ນຫຍັງທີ່ເຮັດໃຫ້ຍຸງເສບຕິດ. ແລ້ວເພິ່ນກໍໄດ້ພົບຄຳຕອບທີ່ອຶ້ງໄປເລີຍວ່າສິ່ງທີ່ຍຸງເສບຕິດບໍ່ແມ່ນເລືອດ ມັນແມ່ນນ້ຳຕານ ນ້ຳຕານ ນ້ຳຕານ (ເຮັດສຽງແບບເອໂຄ).
ຍຸງທຸກໆໂຕຕ້ອງການນ້ຳຕານເພື່ອຄວາມຢູ່ລອດຂອງມັນ. ມີແຕ່ຍຸງໂຕແມ່ເທົ່ານັ້ນທີ່ຕ້ອງການເລືອດ ແຕ່ວ່າ ທັງຍຸງໂຕແມ່ ແລະ ໂຕຜູ້ກະຍັງຕ້ອງການນ້ຳຕານຢູ່ຄືເກົ່າ. ໃນຄວາມເປັນຈິງແລ້ວ ຍຸງຕ້ອງການນ້ຳຕານຫຼາຍກ່ອນເລືອດ ໂດຍເກືອບທຸກໆຄັ້ງຍຸງຈະຫານ້ຳຕານຈາກດອກໄມ້ ແລະ ພືດຊະນິດອື່ນໆ ແຕ່ວ່າດັ່ງທີ່ຮູ້ໆກັນຢູ່ວ່າອາຫານອັນແຊບນົ່ວຂອງມັນກະຍັງໜີບໍ່ພົ້ນມະນຸດເຮົານັ້ນເອງ.
ນັກວິທະຍາສາດ Sandra Allan ໄດ້ນຳເອົານ້ຳຕານປະສົມກັບທ໋ອກຊິກ(toxic) ເພື່ອຂ້າຍຸງ.
ເບິ່ງວີດີໂອປະກອບ
ຂອບໃຈທີມາ insidescience
