ເດດຄັ້ງທຳອິດໃຫ້ທ່ານຄິດຫາກາເຟ
ເຄີຍຄິດແລ້ວຄິດອີກບໍ່ວ່າເດດຄັ້ງທຳອິດເຮົາສິຊວນເຂົາໄປໃສ? ຫຼື ຄິດໄອເດຍດີໆສຳລັບເດດຄັ້ງທຳອິດບໍ່ອອກສິເຮັດແນວໃດໃຫ້ເຂົາປະທັບໃຈ ໂດຍມີປັດໃຈຫຼາຍໆຢ່າງເລີຍລະທີ່ຈະຕ້ອງໄດ້ເອົາເຂົ້າມາປະມວນຜົນບໍ່ວ່າຈະເປັນ ວັນ, ເວລາ, ສະຖານທີ່, ບັນຢາກາດ ແລະ ເງິນ(ປັດໃຈຫຼັກເລີຍ). ຍັງບໍ່ໝົດໆ ຍັງຕ້ອງຖ້າເບິ່ງຜົນຕອບຮັບຕາມຫຼັງອີກວ່າສິເປັນແນວໃດ? ເຂົາສິມັກບໍ່? ມັນສິໂຣແມັນຕິກບໍ່?
ເດດຄັ້ງທຳອິດນັ້ນເປັນໂຕຕັດສິນເລີຍວ່າຄວາມສຳພັນຂອງເຮົາກັບເຂົາຈະໄປກັນໄດ້ບໍ່ ແລະ ມັນຍັງເປັນດ່ານທຳອິດໃນການເກັບຄະແນນເຊິ່ງວ່າເປັນດ່ານທີ່ໄດ້ຄະແນນຫຼາຍກ່ອນໝູ່ໝົດເລີຍກໍວ່າໄດ້.
ບາງຄັ້ງມັນກໍອາດຈະເປັນເລື່ອງທີ່ຍາກຫຼາຍສຳລັບບາງຄົນທີ່ຈະຄິດໂດຍສະເພາະຄົນທີ່ກຳລັງຈະເປັນເດດທຳອິດຂອງເຂົາ(ມືໃໝ່) ຫຼືວ່າ ຄົນທີ່ອອກເດດຫຼາຍຄັ້ງແລ້ວກໍຕາມ. ມັນອາດຈະຍາກໃນການທີ່ເຮົາຈະເກັບຄະແນນຈາກເຂົາ ໂດຍສະເພາະເມື່ອເຮົາຍັງບໍ່ຮູ້ຈັກເຂົາດີພໍ.
ສ່ວນຫຼາຍແລ້ວທີ່ເຫັນໆກັນກໍຈະເຫັນແຕ່ໄປເບິ່ງໜັງ ຕໍ່ດ້ວຍໄປກິນເຂົ້າ(ຈະກ່ອນ ຫຼື ຫຼັງກໍແລ້ວແຕ່ລະສະຖານະການຂອງແຕ່ລະຄົນ) ຫຼື ຊວນໄປກິນເຂົ້າເລີຍ.
ຖ້າຫາກທ່ານຄິດຫຍັງບໍ່ອອກສຳລັບເດດຂອງທ່ານ ເຮົາຂໍແນະນຳໃຫ້ທ່ານຄິດຫາກາເຟມັນອາດຈະຟັງເບິ່ງແປກໆແນ່ໜ້ອຍໜຶ່ງ ເຮົາເຊື່ອວ່າກາເຟນີ້ລະເປັນໂຕຊັກຈູງທີ່ດີສຳລັບການເລີ່ມຕົ້ນຂອງການສົນທະນາ ແລະ ນຳໄປສູ່ຄວາມສຳພັນທີ່ດີ.
5 ເຫດຜົນສຳລັບເລືອກຮ້ານກາເຟ
1. ປອດໄພ ແລະ ສະດວກສະບາຍ
ປັດຈຸບັນເຫັນວ່າຮ້ານກາເຟກຳລັງບູມຫຼາຍໃນນະຄອນຫຼວງວຽງຈັນຢູ່ແຖວໃດໆກະເຕັມໄປດ້ວຍຮ້ານກາເຟເກືອບວ່າຢູ່ຊອກໃດແຈໃດຫາບໍ່ຍາກ, ແນ່ນອນມັນແມ່ນສະຖານທີທີ່ເໝາະເຈາະເລີຍໃນການເລືອກເພື່ອເດດກັບໃຜບາງຄົນ. ຮ້ານກາເຟເປັນສະຖານທີຄົນທົ່ວໄປສາມາດເຂົ້າໃຊ້ບໍລິການໄດ້, ງ່າຍຕໍ່ການໃຊ້ບໍລິການ, ເປັນກັນເອງເຮັດຄືຢູ່ບ້ານໂຕເອງໂລດ #ຜິດໆ ແລະ ທີສຳຄັນມີອິນເຕີເນັດໄວ້ໃຫ້ຫຼິ້ນຟຣີ ນຳອີກ ຈະອັບໂຫຼດຮູບ, ເຊັກອິນຜ່ານ Facebook, Instagram, Twitter ສະບາຍບໍ່ເປືອງເນັດເຮົາ #ຜິດໆ.
ເກືອບວ່າທຸກຄົນແມ່ນມັກກາເຟ ຫຼື ຊາ ຫຼື ເຄື່ອງດື່ມປະເພດອື່ນໆສະນັ້ນການເດດຢູ່ຮ້ານກາເຟນັ້ນເປັນສິ່ງທີ່ເໝາະສຳລັບທຸກເພດທຸກໄວ ແລະ ເກືອບວ່າທຸກຄົນຖ້າຫາກວ່າຊວນໄປກິນກາເຟຕ້ອງບໍ່ເອີຍຄຳວ່າປະຕິເສດແນ່ນອນ ຖ້າວ່າລ້ຽງ #ຜິດໆ.
ຖ້າຫາກວ່າວາງແຜນຈັກໜ້ອຍໜຶ່ງ, ຫຼັງຈາກດື່ມກາເຟແລ້ວແມ່ນທ່ານສາມາດຕໍ່ກິດຈະກຳອື່ນໆໄດ້ຕາມອັດທະຍາໄສທາງດ້ານຄວາມຄິດຂອງແຕ່ລະຄົນ ໂດຍເຮົາອາໄສເອົາການກິນກາເຟເປັນໂຕເຊື່ອມລະຫວ່າງກິດຈະກຳຫຼັກທີ່ເຮົາຈະເຮັດກະໄດ້. ສະນັ້ນ, ຫາກວ່າເດດຂອງທ່ານມີທ່າທີຈະຫຼົ້ມ ທ່ານສາມາດຈົບການສົນທະນາແບບໄວວາໄດ້ໂດຍງ່າຍດ້ວຍການດື່ມພຽງຈອກດຽວ. ແຕ່ຫາກວ່າໄປດ້ວຍດີທ່ານກໍສາມາດຕໍ່ດ້ວຍກິດຈະກຳອື່ນເລີຍ.
2. ປະຢັດ ແລະ ບໍ່ກົດດັນຫຼາຍ
ຫຼາຍຄົນຄົງຈະຄິດວ່າການອອກເດດຄັ້ງທຳອິດເຮົາຈະຕ້ອງຫາຮ້ານຫຼູໆດັງໆ, ສັ່ງອາຫານແພງໆ ເພື່ອຢາກເຮັດເຮັດຜູ່ນັ້ນປະທັບໃຈ…ແຕ່ເຮົາຄິດວ່າບໍ່ເລີຍມັນເປັນຫຍັງທີ່ສິ້ນເປືອງເອົາຊື່ໆ, ມັນຍັງເປັນການເພີ່ມຄວາມກົດດັນໃຫ້ທັງຜູ່ຈ່າຍ ແລະ ຜູ່ຈ່າຍໃຫ້. ເພາະສະນັ້ນ, ຈະດີກ່ວາບໍ່ຖ້າວ່າເຮົາຈະເລີ່ມທຳຄວາມຮູ້ຈັກໃຜບາງຄົນໃນສະຖານະການທີ່ປາດສະຈາກຄວາມຄາດຫວັງສູງເກີນໄປ ແລະ ການເປັນໜີ້ບຸນຄຸນໃຜຫຼາຍເກີນໄປ.
ປະຢັດ, ເປັນກັນເອງ ແລະ ລຽບງ່າຍດີທີ່ສຸດ.
ການເຮັດກິດຈະກຳທີ່ມີລາຄາແພງຕັ້ງແຕ່ຕອນທຳອິດປົກກະຕິແລ້ວຈະເຮັດໃຫ້ທ່ານໜ້າສົນໃຈໜ້ອຍລົງສຳລັບຜູ່ນັ້ນ. ເນື່ອງຈາກວ່າຈະເກີດສິ່ງທີ່ເອີ້ນວ່າ: “overjustification effect” ເປັນພຶດຕິກຳທີ່ເກີດຂຶ້ນເມື່ອຜູ່ໃດຄົນໜຶ່ງຖືກຄາດຫວັງດ້ວຍແຮງກະຕຸ້ນຈາກພາຍນອກເຊັ່ນ: ເງິນ ຫຼື ຂອງລາງວັນ ໂດຍມັນເຮັດໃຫ້ໄປຫຼຸດແຮງຈູງໃຈພາຍໃນໂຕຂອງຄົນຜູ່ນັ້ນລົງໃນການເຮັດກິດຈະກຳ. ປົກກະຕິແລ້ວເວລາບາງຄົນມີຊ່ວງເວລາທີ່ດີໆກັບເຮົາ, ເຂົາຜູ່ນັ້ນຂ້ອນຂ້າງມີອາລົມຄວາມຮູ້ສຶກຕໍ່ເຮົາ ໝາຍຄວາມວ່າເຮົາເລີ່ມເປັນທີ່ສົນໃຈຕໍ່ເຂົາ. ກົງກັນຂ້າມເວລາມີຂອງມີຄ່າ ແລະ ໜ້າສົນໃຈເຂົ້າມາ ຄົນສ່ວນຫຼາຍມັກຈະຫັນມາໃຫ້ຄວາມສົນໃຈກັບສິ່ງນັ້ນຫຼາຍກ່ວາ. ໃນຈຸດໆນີ້ເຮົາເຫັນໄດ້ວ່າກາເຟເປັນພຽງແຕ່ໂຕປະກອບຊື່ໆ ເຮັດໃຫ້ທ່ານເປັນສິ່ງດຽວທີ່ເຂົາສົນໃຈໃນເວລານັ້ນ.
3. ການຊັກຈູງ
ສານຄາເຟອິນ(caffeine) ໂດຍທົ່ວໄປຈະເຮັດໃຫ້ເຮົາມີຄວາມຕື່ນໂຕຍິ່ງຂຶ້ນ ແລະ ຮູ້ສຶກຊ່ວງຈາກອາການຢາກນອກ. ນັ້ນເຮັດໃຫ້ເຂົາເກີດມີຄວາມສົນໃຈໃນເວລາເຮົາເວົ້າ ແລະ ສາມາດຊັກຈູງໄດ້ງ່າຍເມື່ອມີການຜິດຖຽງກັນໃນທາງທີ່ສ້າງສັນ. ສະນັ້ນ, ສານຄາເຟອິນຈະເຮັດໃຫ້ທັງສອງຄົນນັ້ນຮູ້ສຶກລົມກັນແບບບໍ່ຮູ້ໂມງຮູ້ຍາມເລີຍລະ.
4. ການເຊື່ອມສຳພັນທີ່ດີ
ກາເຟ ຫຼື ອາຫານເປັນຕົວຢ່າງທີ່ດີສຳລັບການສື່ຄວາມຮູ້ສຶກດີໆໆໃຫ້ກັບຄົນອ້ອມຂ້າງ ແລະ ຄວາມສຳພັນທີ່ດີ. ເປັນທີ່ຮູ້ຈັກກັນດີສຳລັບສິ່ງທີ່ກ່າວມານີ້ວ່າ: “the Luncheon Effect” ທິດສະດີຂອງທ່ານ Razran ປີ 1938 ເປັນພຶດຕິກຳການຊັກຈູງຄົນດ້ວຍອາຫານ ໂດຍລະຫວ່າງທີ່ເຮົາກຳລັງກິນນັ້ນເຮົາອາດຈະຮັບຄວາມຄິດເຂົ້າມາງ່າຍຄືກັນກັບອາຫານ. ເຮົາເຄີຍສັງເກດບໍ່ວ່າເປັນຫຍັງຄົນໃນແວດວົງທຸລະກິດເຂົາຈະມີຂໍ້ສະເໜີຫຍັງ ຫຼື ລົມເລື່ອງຂໍ້ຕົກລົງຕ່າງໆເຂົາມັກຈະໄປລົມກັນໃນຮ້ານອາຫານ.
ນັ້ນໝາຍຄວາມວ່າຫາກຜູ່ທີ່ລ້ຽງອາຫານ ຫຼື ເຄື່ອງດື່ມຜູ່ນັ້ນຈະມີຄວາມຮູ້ສຶກໃກ້ຊິດກັບຜູ່ທີ່ຖືກລ້ຽງ. ຖ້າຢາກໃຫ້ຊິດກັບໃຜຜູ່ໜຶ່ງເປັນຫຍັງທ່ານຄືບໍ່ລອງລ້ຽງນ້ຳຜູ່ນັ້ນຈັກຄັ້ງໜຶ່ງລອງເບິ່ງແລກກກັບຄວາມສຳພັນທີດີເຊິ່ງກັນ ແລະ ກັນ.
5. ຕື່ນໂຕ
ທ້າຍສຸດ ແລະ ເດັດສຸດ, ສານຄາເຟອິນໃນກາເຟ, ຊາ ແລະ ໂກ່ໂກ້ ເປັນສານກະຕຸ້ນ. ດັ່ງທີ່ຮູ້ກັນເມື່ອເຮົາຮັບສານນີ້ເຂົ້າໄປເຮົາຈະຮູ້ສຶກຫົວໃຈເຕັ້ນໄວຂຶ້ນ, ເລືອກສູບສີດ ແລະ ຮ່າງກາຍເຮົາມີພະລັງ. ສິ່ງທີ່ກ່າວມານີ້ລ້ວນແລ້ວແຕ່ແມ່ນຄວາມຮູ້ສຶກທີ່ເກີດຂຶ້ນເມື່ອເຮົາກຳລັງຕົກຫຼຸມຮັກໃຜຈັກຄົນໜຶ່ງ. ຕາມຄວາມເປັນຈິງແລ້ວຄົນເຮົາຈະແຍກບໍ່ອອກດອກ ເຊິ່ງພຶດຕິກຳນີ້ເອີ້ນວ່າ: “misattribution of arousal” ເປັນພຶດຕິກຳທີ່ຄົນເຮົາຈະຄິດວ່າສິ່ງທີ່ຕົນພົບຢູ່ນັ້ນແມ່ນຖືກ ແຕ່ທີ່ຈິງແລ້ວຜິດເຊິ່ງສິ່ງນັ້ນເຮັດໃຫ້ເຂົາຮູ້ສຶກຕື່ນໂຕ ຫຼື ເວົ້າອີກຢ່າງໜຶ່ງວ່າ: ອາລົມລວງ.
ສະນັ້ນ, ກາເຟຈະເຮັດໃຫ້ຄົນທີ່ທ່ານລົມນຳນັ້ນຫົວໃຈຂອງລາວຈະເຕັ້ນໄວຂຶ້ນ ເຊິ່ງມັນຈະເຮັດໃຫ້ລາວຄິດວ່າເປັນເພາະທ່ານທີ່ເຮັດໃຫ້ລາວເປັນແບບນັ້ນ.
