ເປັນຫຍັງເຮົາຄືຍັງໃຊ້ SMS ຢູ່?
SMS ຫຼື Short Message Service ຫຼື ບໍລິການສົ່ງຂໍ້ຄວາມສັ້ນຜ່ານຄື້ນສັນຍານໂທລະສັບ, ເຮົາເຄີຍສົງໄສບໍ່ວ່າເປັນຫຍັງຄົນເຮົາຄືຍັງໃຊ້ບໍລິການນີ້ຢູ່ໃນເມື່ອຍຸກນີ້ແມ່ນຍຸກອີ່ຫຍັງກະເຊື່ອມຕໍ່ອິນເຕີເນັດໝົດແລ້ວ ແລະ ການສື່ສານຂອງຄົນເຮົາກໍໄດ້ກ້າວເຂົ້າໄປເປັນການສື່ສານແບບດີຈິຕອນ(Digital) ໝົດແລ້ວຕົວຢ່າງເຊັ່ນ: ການສົ່ງຂໍ້ຄວາມອັກສອນ, ພາບ ຫຼື ສຽງກໍໃຊ້ບໍລິການດັ່ງໆເຊັ່ນ: Whatsapp, Line, WeChat ເປັນຕົ້ນ.
ເຮົາມາເບິ່ງປະຫວັດຫຍໍ້ຂອງ SMS ກັນ, ເລີ່ມຕົ້ນດ້ວຍບໍລິການ SMS ໄດ້ເລີ່ມຕົ້ນໃຊ້ກັນຕັ້ງແຕ່ປີ 1992 ເປັນຕົ້ນມາ, ແຕ່ວ່າມາຮອດປີ 2010 ນັ້ນແມ່ນເປັນຍຸກຂອງ Smartphone ເຮັດໃຫ້ຜູ້ອຸປະໂພກໄດ້ຫັນປ່ຽນໄປໃຊ້ບໍລິການ ການສື່ສານທີ່ທັນສະໃໝ່ຍິ່ງຂຶ້ນເປັນຕົ້ນແມ່ນແອັບສົ່ງຂໍ້ຄວາມເປັນຕົ້ນ.
ຫຼັງຈາກນັ້ນເຮົາກໍຄິດໄດ້ວ່າ SMS ຄົງຈະບໍ່ມີໃຜໃຊ້ງານແລ້ວ ແຕ່ຈັ່ງໃດກໍຕາມ ມັນກະຍັງຄົງເປັນການສື່ສານຫຼັກຂອງຄົນເຮົາຢູ່ຄືເກົ່າໂດຍປະໂຫຍດຂອງມັນມີດັ່ງນີ້:
SMS ເປັນທາງເລືອກທີ່ໄດ້ຜົນທີສຸດໃນການເຂົ້າເຖິງຜູ່ໃຊ້ທັນທີທັນໃດ ດ້ວຍອັດຕາການເປີດອ່ານ 90 ເປີເຊັນ
ການບໍລິການ SMS ນັ້ນສາມາດໃຊ້ໄດ້ເລີຍຕາບໃດທີ່ທ່ານມີໂທລະສັບ ແລະ ການບໍລິການຂອງຜູ່ໃຫ້ບໍລິການຂອງທ່ານ ເຊິ່ງແນ່ນອນວ່າຄອບຄຸມເກືອບ 90% ຂອງທຸກບ່ອນທີ່ທ່ານໄປ. ສິ່ງນີ້ເປັນຈຸດແຂງເຮັດໃຫ້ເຮົາຍັງສາມາດຕິດຕໍ່ກັນໄດ້ບໍ່ວ່າຈະຢູ່ໃສ ບ່ອນທີ່ບໍ່ມີອິນເຕີເນັດກະຍັງໄດ້ ແລະ ສິ່ງທີ່ສຳຄັນຄືບໍ່ຕ້ອງການສິ່ງອື່ນໆອີກ ຕົວຢ່າງ: ການໃຊ້ບໍລິການສົ່ງຂໍ້ຄວາມຜ່ານ Whatsapp ນັ້ນ ຜູ່ສົ່ງ ແລະ ຜູ່ຮັບຈະຕ້ອງໄດ້ຕິດຕັ້ງ Whatsapp ເສຍກ່ອນຈຶ່ງສົ່ງຫາກັນໄດ້ ແລະ ທີ່ສຳຄັນອີກຢ່າງຕ້ອງມີອິນເຕີເນັດນຳອີກດ້ວຍ. ຖ້າເຮົາມີຕິດຕັ້ງ Whatsapp ແລ້ວສົ່ງໄປຫາຄົນທີ່ບໍ່ມີນັ້ນ ຜູ່ຮັບຈົນເຖົ້າລະກະຍັງບໍ່ໄດ້ຮັບຂໍ້ຄວາມຈາກທ່ານ. ສະນັ້ນ, SMS ເປັນທາງເລືອກທີ່ດີໃນຈຸດໆນີ້.
ບໍ່ມີອິນເຕີເນັດ, ບໍ່ໄດ້ໂຫຼດແອັບ, ບໍ່ມີ Smartphone, ຮູ້ແຕ່ເບີ ຢາກແຊັດນຳໝູ່, ນຳຜູ່ສາວ, ຜູ່ບ່າວ ໃຊ້ SMS ລະແລ້ວໂລດ.
ເນື່ອງຈາກວ່າເທັກໂນໂລຢີຂອງ SMS ນັ້ນບໍ່ຈຳເປັນຕ້ອງໃຊ້ອິນເຕີເນັດ, ບໍ່ຈຳເປັນຕ້ອງມີອິນເຕີເນັດທີ່ໄວເວີ້, ບໍ່ຈຳເປັນຕ້ອງມີແອັບເສີມເພື່ອໃຊ້ງານ, ບໍ່ຈຳເປັນຕ້ອງມີໂທລະສັບໄອຟົ້ງ ກະສົ່ງຂໍ້ຄວາມໄດ້ຄືກັນ. ນອກນັ້ນ, ຍັງບໍ່ຈຳເປັນຕ້ອງສະໝັກເປັນສະມາຊິກໃດໆກ່ອນໃຊ້ງານຄືກັນກັບ Whatsapp, WeChat, Line ເປັນຕົ້ນ.
ຢືນຢັນບຸກຄົນ ແລະ ຄວາມປອດໄພສອງຂັ້ນຕອນດ້ວຍ SMS
ປັດຈຸບັນ, ເຖິງວ່າເທັກໂນໂລຢີການສື່ສານຈະກ້າວໄປໄກແລ້ວແຕ່ກໍຍັງຈຳເປັນຕ້ອງໄດ້ໃຊ້ບໍລິການເກົ່າໆຢູ່ໃນການເຮັດທຸລະກຳ ຫຼື ໃນການລະບຸຕົວຕົນຜູ່ໃຊ້ງານ. ທັງນີ້ທັງນັ້ນວິທີນີ້ຍັງເປັນວິທີທີ່ປະຢັດກ່ວາການໃຊ້ຂໍ້ຄວາມສຽງ ຫຼື ໂທ. ໂດຍເຮົາຈະເຫັນວ່າການໃຊ້ SMS ໃນການຢືນຢັນສອງຂັ້ນນັ້ນ ແມ່ນຖືກໃຊ້ແຜ່ຫຼາຍໃນບໍລິສັດໃຫຍ່ໆເຊັ່ນ: Google, Apple, Facebook, Twitter, Dropbox ແລະ LinkedIN.
ເຮົາເຫັນບໍ່ວ່າການຢືນຢັນຂອງແອັບ Whatsapp, Line ແລະ WeChat ນັ້ນເພິ່ນຍັງໃຊ້ວິທີການສົ່ງລະຫັດຜ່ານຂໍ້ຄວາມຢູ່ຄືເກົ່າ ເຫັນບໍ່ວ່າ SMS ນັ້ນຍັງຄົງສຳຄັນຢູ່.
ຖ້າຍັງມີໂປໂມຊັນ 1000 ສະບັບນິຄົງສິຄັກດີ, ຄິດຮອດສະໄໝນັ້ນເດ! ຕອນລຸ້ນໄຟສາຍກຳລັງບູມ. ມີໃຜຍັງຈື່ໄດ້ແນ່?