ຂໍ້ແນະນຳກ່ອນການເປັນນັກສຶກສາມະຫາວິທະຍາ
ບົດຄວາມນີ້ຈະເປັນການເລົ່າປະສົບການ ແລະ ຂໍ້ແນະນຳສຳລັບນ້ອງໆທີ່ກຳລັງຈະກ້າວຂ້າມຈາກການເປັນນັກຮຽນມາເປັນນັກສຶກສາ. ເຈົ້າຂອງບ໋ອກກໍກຳລັງຈະຈົບຈາກການເປັນນັກສຶກສາ ແລະ ຈະກ້າວໄປເປັນເປັນພະນັກງານແລ້ວກໍຢາກຈະມາເລົ່າປະສົບການ ແລະ ສິ່ງທີ່ຢາກໃຫ້ນ້ອງໆໄດ້ຮູ້ວ່າຊີວິດໃນຮົ້ວມະຫາໄລນັ້ນເປັແນວນໃດ ບາງເທື່ອມັນອາດຈະບໍ່ເປັນດັ່ງທີ່ເຮົາໄດ້ຄິດໄວ້ ຫຼື ອາດຈະເປັນດັ່ງທີ່ເຮົາປາດຖະໜາໄວ້.
ກ່ອນທີ່ເຮົາຈະເຂົ້າໄປລົງເລິກກວ່ານີ້ເຮົາລອງມານິຍາມກັນເບິ່ງກ່ອນວ່າການເປັນ ນັກຮຽນ ແລະ ນັກສຶກສາ ມັນຕ່າງກັນບ່ອນໃດ? ຄວາມຄິດສ່ວນໂຕຂອງຜູ່ຂຽນນັ້ນຄິດວ່າ ການເປັນນັກຮຽນນັ້ນໝາຍເຖິງການທີ່ເຮົາເປັນຜູ່ຮັບພຽງຢ່າງດຽວໝາຍຄວາມວ່າ ກິດຈະກຳຕ່າງໆໃນໄວທີ່ເຮົາເປັນ ນັກຮຽນ ຢູ່ນັ້ນແມ່ນ ເຮົາບໍ່ໄດ້ຄິດຫຍັງຫຼາຍ ຄິດພຽງແຕ່ວ່າສິ່ງທີ່ຮຽນຮູ້ມານັ້ນມັນຖືກຕ້ອງໝົດ ແລະ ບໍ່ກ້າສະແດງຄວາມຄິດເຫັນ ຫຼື ບໍ່ກ້າແມ່ນແຕ່ໂຕ້ແຍ້ງອາຈານເລີຍ. ກົງກັນຂ້າມ ການເປັນ ນັກສຶກສາ ແມ່ນເຮົາຈະຕ້ອງໄດ້ຮຽນໜັກຄວາມເກົ່າ, ຕ້ອງໄປຄົ້ນຄວ້ນອກເວລາຮຽນ, ຄິດແຕກຕ່າງຈາກອາຈານ ແລະ ສາມາດອອກຄຳຄິດເຫັນໄດ້ງ່າຍກວ່າ ແລະ ເປັນກັນເອງກັບອາຈານຍິ່ງຂຶ້ນ.
ຈະຮຽນຫຍັງດີ?
ທີ່ສຳຄັນກ່ອນອື່ນໝົດຫຼັງຈາກທີ່ເຮົາໄດ້ຈົບການສຶກສາລະດັບມັດທະຍົມແລ້ວ ກໍຄືວ່າເຮົາຈະໄປຮຽນຫຍັງ? ບາງຄົນອາດຈະເຫີໄປຮຽນນຳໝູ່ ຫຼື ພໍ່ແມ່ເລືອກໃຫ້ຮຽນ ຫຼື ຮຽນຕາມທີ່ຕົນເອງມັກ ຫຼາຍກໍລະນີແຕກຕ່າງກັນໄປ. ການເລືອກຮຽນໃນຄະນະ ຫຼື ສາຂາວິຊາໃດໜຶ່ງນັ້ນ ມັນເປັນໂຕຊີ້ວັດອານະຄົດຂອງເຮົາເລີຍແຫຼະວ່າຫຼັງຈາກຈົບໄປແລ້ວເຮົາຈະເປັນຫຍັງ ຫຼື ຢາກເຮັດວຽກຢູ່ໃສ.
ສຳລັບໃຜທີ່ຍັງເລືອກບໍ່ໄດ້ວ່າຮຽນຫຍັງ ເຮົາລອງຖາມໂຕເອງເບິ່ງວ່າເຮົາມັກຫຍັງ ແລະ ເຮົາເກັ່ງດ້ານໃດ? ເມື່ອເຮົາຮູ້ແລ້ວເຮົາກໍເລືອກຮຽນອັນນັ້ນໂລດ. ຈາກປະສົບການຂອງຜູ່ຂຽນ ເຫັນວ່າບາງຄັ້ງ ເຮົາເລືອກຮຽນສາຂາທີ່ເຮົາມັກແລ້ວແຕ່ວ່າເຮົາເບິ່ງແລ້ວຄົງຈະໄປບໍ່ລອດ ຫຼື ປ່ຽນໃຈກາງເທີມ ເນື່ອງຈາກວ່າວິຊາທີ່ຮຽນ.
ມີເວລາຫວ່າງຫຼາຍແຕ່ຢ່າປ່ອຍໃຫ້ມັນເສຍໄປກັບການຫຼິ້ນ ແລະ ນອນ
ມື້ໜຶ່ງຮຽນແຕ່ ຊົ່ວໂມງດຽວ ຫຼື ຮຽນແຕ່ເຄິ່ງມື້ ຫຼັງຈາກນັ້ນກໍ່ກັບບ້ານ ຫຼື ໄປເບິ່ງໜັງ, ຊຸມແຊວແມວໂພງ ຫຼື ເຮັດກິດຈະກຳອື່ນໆທີ່ບໍ່ເປັນປະໂຫຍດ.
ຖ້າເຮົາຍັງມີຄວາມຄິດນີ້ຢູ່ ຈົ່ງປ່ຽນມັນສະ ປ່ຽນຕັ້ງແຕ່ປີທຳອິດທີ່ເຂົ້າຮຽນດີທີ່ສຸດ! ການຫຼັກສູດການສອນເຮັດໃຫ້ເຮົາມີເວລາຫວ່າງຫຼາຍນັ້ນ ແມ່ນກໍເພື່ອໃຫ້ເຮົາໄປຄົ້ນຄວ້າບົດຮຽນຕື່ມ ຢ່າລືມວ່າເຮົາເປັນ ນັກສຶກສາ ບໍ່ແມ່ນນັກຮຽນທີ່ອາຈານເອົາຫຍັງໃຫ້ມາກໍເບິ່ງຕາມນັ້ນ ແລະ ຈື່ຕາມນັ້ນ ເຮົາກ້າວຜ່ານການເປັນນົກແກ້ວແລ້ວ. ເຮົາມາເປັນນົກອິນຊີແລ້ວທີ່ເວລາໃດກໍອອກເລາະຄຸບເຫຍື່ອ(ຜູ່ສາວ ບໍ່ແມ່ນລະ) ເຫຍື່ອຢູ່ບ່ອນນີ້ໝາຍຄວາມວ່າ ຄວາມຮູ້ນັ້ນເອງ. ຄວາມຮູ້ທີ່ອາຈານສອນຢູ່ຫ້ອງຮຽນນັ້ນເປັນພຽງສ່ວນນ້ອຍຂອງສິ່ງທີ່ເຮົາຕ້ອງຮຽນຮູ້ເທົ່ານັ້ນ, ເຮົາເຄີຍສັງເກດໂຕເອງບໍ່ວ່າເປັນຫຍັງອາຈານສອນບໍ່ເຂົ້າໃຈ ນັ້ນບໍ່ແມ່ນຍ້ອນອາຈານ ມັນຍ້ອນວ່າບົດຮຽນທີ່ອາຈານນຳມາສອນໃຫ້ພວກເຮົານັ້ນມັນຍາກທີ່ຈະເຂົ້າໃຈພາຍໃນເວລາໜຶ່ງຊົ່ວໂມງ ຍິ່ງບົດຮຽນທີ່ເອົາມາສອນນັ້ນມັນຍັງເປັນບົດຮຽນລະດັບທີ່ເຂົ້າໃຈຍາກກວ່າເຮົາຮຽນຢູ່ມັດທະຍົມອີກ. ສະຫຼຸບ ເຮົາຄວນເອົາເວລາຫວ່າງເຂົ້າຫ້ອງສະໝຸດອ່ານປຶ້ມຄົ້ນຄ້ວາຕື່ມ. ຈາກສົບການທີ່ເຈີໂຕຈິງຂອງຜູ່ຂຽນ ແມ່ນຕອນນີ້ ປີສີ່ ແມ່ນເວລາຫວ່າງແມ່ນຄິດຫາຫ້ອງສະໝຸດເລີຍ ຕ່າງຈາກແຕ່ກ່ອນທີ່ແບບວ່າພໍແຕ່ຮຽນແລ້ວແມ່ນກັບບ້ານໂລດ.
ມະຫາໄລເປັນບ່ອນບົ່ງເພາະສະມາຄົມ (ກຸ່ມ)
ຮຽນແລ້ວກັບບ້ານ, ກັບຫ້ອງບໍ່ສົນໃຈໃຜ ຍາມຮຽນກໍມາຮຽນ. ນັ່ງໃນຫ້ອງກໍບໍ່ລົມໃຜ, ຂີ້ອາຍ, ບໍ່ກ້າອອກຄຳຄິດເຫັນ ຫຼື ສະແດງຄວາມສາມາດຂອງຕົນເອງອອກມາ
ມາຫາໄລແມ່ນບ່ອນທີ່ເຮົາໄດ້ພົບປະກັບຫຼາຍໆຄົນເປັນຕົ້ນແມ່ນນັກສຶກສາທີ່ມາຈາກຕ່າງແຂງ, ນັດສຶກສາແລກປ່ຽນ, ເປັນສູນລວມຂອງການທີ່ຈະໄດ້ພົບກັບນັກສຶກສາຄົນອື່ນທີ່ຮຽນຕ່າງຄະນະ, ຕ່າງສາຂາ. ການທີ່ເຮົາໄດ້ພົບກັບໝູ່ໃໝ່ໆ ຈາກຄະນະອື່ນ ຫຼື ສາຂາອື່ນ ເປັນການໄດ້ຝຶກເຮົາຮັບມືກັບສະພາບແວດລ້ອມໂຕຈິງທີ່ຈະເກີດຂຶ້ນໃນບ່ອນເຮັດວຽກ ແລະ ເປັນການສ້າງພັນທະມິດອັນດີ ຕົວຢ່າງ ເຮົາຮຽນຢູ່ ສາຂາເສດຖະສາດ ບັງເອີນວ່າເຮົາໄດ້ເຮັດບົດລາຍງານກ່ຽວກັບການເຮັດໂຄງການສ້າງທາງ ເຮົາຊ້ຳພັດບໍ່ຮູ້ລາຍລະອຽດເລື່ອງນີ້ເລີຍ, ແຕ່ຖ້າເຮົາມີໝູ່ ຫຼື ຄົນຮູ້ຈັກທີ່ຮຽນໃນຄະນະ ສະຖາປັດ ຫຼື ສາຂາຂົວທາງ ເຮົາກໍສາມາດສອບຖາມລາຍລະອຽດໄດ້ ດີກວ່າເຮົາຕ້ອງມະໂນໄປເອງ ຫຼື ໄປເສຍເວລາຄົ້ນຫາຂໍ້ມູນ ບາງເທື່ອຂໍ້ມູນທຸກຢ່າງມັນກະບໍ່ໄດ້ຢູ່ເທິງໂລກອິນເຕີເນັດສະເໝີໄປ.
ງານກ່ຽວກັບການສຶກສາ ຫຼື ງານກ່ຽວກັບການຝຶກອົບຮົມ ເຮົາບໍ່ຄວນພາດ, ການທີ່ເຮົາໄດ້ເຂົ້າຮ່ວມງານໃດງານໜຶ່ງມັນເປັນການເສີມສ້າງທັກສະດ້ານມະນຸດສຳພັນ ເຊິ່ງເປັນທັກສະທີ່ເຮົາຈະຕ້ອງໄດ້ເອົາມານຳໃຊ້ຫຼາຍເມື່ອເຮົາເຮັດວຽກໃນຫ້ອງການ.
ຫາສະມາຄົມ (ກຸ່ມ)ທີ່ຕົນມັກ
ສະມາຄົມໃນໂລກຂອງນັກສຶກສາ ມັນເປັນຫຍັງທີ່ມີປະໂຫຍດຫຼາຍ ແລະ ນັກສຶກສາແຕ່ລະຄົນຄວນເຂົ້າຮ່ວມສະມາຄົມທີ່ຕົນມັກໃຫ້ໄດ້. ຄວາມໝາຍຂອງ ສະມາຄົມ ກໍຄື ກຸ່ມຄົນໜຶ່ງທີ່ມີແນວຄິດຄືກັນ, ມີວິໄສທັດຄືກັນ ແລະ ແລກປ່ຽນຄວາມຮູ້ເຊິ່ງກັນ ແລະ ກັນ. ເມື່ອເຮົາເຂົ້າເປັນສະມາຊິກຂອງສະມາຄົມ ຫຼື ກຸ່ມໃດໜຶ່ງແລ້ວ ເຮົາກໍ່ສາມາດມີໂອກາດໄດ້ແລກປ່ຽນຄວາມຮູ້, ເປັນທັງຜູ່ຮັບ ແລະ ຜູ່ໃຫ້.
ຮູ້ຈັກ Keyword
ການຮຽນໃນຫ້ອງຮຽນຢູ່ມະຫາວິທະຍາໄລນັ້ນ ມັນຈະຕ່າງຈາກຕອນຢູ່ມັດທະຍົມຫຼາຍເຕີບເພາະຈະແບ່ງເປັນ 2 ສ່ວນໃຫຍ່ຄື ພາກທິດສະດີ (lecture) , ພາກລົງໂຕຈິງ (in practice) ແລະ ມັນບໍ່ແມ່ນວ່າຮຽນແລ້ວລະເຮັດບົດຝຶກຫັດເລີຍ ແຕ່ມັນຈະເປັນແບບວ່າຮຽນທິດສະດີແລ້ວ ປະຫວ່າງໄວ້ ອີກມື້ໜຶ່ງ ຫຼື ສອງມື້ ລະຈຶ່ງແມ່ນພາກເຮັດບົດຝຶກຫັດ ແລ້ວແຕ່ລະວີຊາແມ່ນຂຶ້ນບໍ່ເກີນ 1ຊົ່ວໂມງ (ຈະປ່ຽນໄປແຕ່ລະຄະນະ, ວິຊາ, ອາຈານ) ແລ້ວເຮົາຈະເຮັດແນວໃດໃຫ້ທັນກັບອາຈານສອນ ຫຼື ເຮັດແນວໃດຈະເຂົ້າໃຈສິ່ງທີ່ອາຈານສອນ.
Keyword ເປັນອີ່ຫຍັງທີ່ນັກສຶກສາທຸກຄົນຕ້ອງຮູ້ ການຮຽນຮູ້ທີ່ດີບໍ່ແມ່ນວ່າເຮົາຈະຈົດທຸກໆຢ່າງທຸກໆຄຳທີ່ອາຈານເຂົາສອນ ແຕ່ເຮົາຈະຕ້ອງຈົດສິ່ງທີ່ມັນສຳຄັນ ແລະ ສິ່ງທີ່ຖືກຢ້ຳຕະຫຼອດ. ໃນບາງວິຊາ ແລະ ອາຈານສ່ວນຫຼາຍຈະໃຫ້ເອກະສານມາແລ້ວໃຫ້ເຮົາເບິ່ງຕາມເອກະສານຖືວ່າສະດວກຂຶ້ນຕື່ມ. ການຈົດ Keyword ສຳຄັນແລ້ວເຮົາມາຄົ້ນຄ້ວາເອົາເອງມັນມີຂໍ້ດີຫຍັງແນ່?
- ສ້າງຄວາມເຂົ້າໃຈດ້ວຍໂຕເຮົາເອງ ໃນແບບຂອງເຮົາ ການເຮັດແບບນີ້ມັນຈະເຮັດໃຫ້ເຮົາຈື່ໄດ້ດົນ ເພາະວ່າເຮົາສາມາດປະຕິດປະຕໍ່ຂໍ້ມູນເຂົ້າໃນແບບທີ່ເຮົາເຂົ້າໃຈດ້ວຍໂຕເຮົາເອງ.
- Keyword ຈະນຳໄປສູ່ການແຕ້ມແຜນວາດ. ການແຕ້ມແຜນວາດຄວາມເຂົ້າໃຈຂອງເຮົາຈະເຮັດໃຫ້ເຮົາຈື່ດີ ແລະ ເຂົ້າໃຈໄດ້ທັນທີ່ ກ່ອນການຈົດຈາກເທິງລົງລຸ່ມ ເພາະເຮົາມັກຈື່ແບບຮູບພາບຫຼາຍກ່ວາການຈື່ແບບໂຕໜັງສືແຖວຕໍ່ແຖວ.
- ເອົາເວລາຈົດໄປຕັ້ງໃຈຟັງຄຳອະທິບາຍດີກ່ວາ. ການທຳຄວາມເຂົ້າໃຈຈະດີກ່ວາທີ່ເຮົາຈົດເອົາໝົດທຸກຢ່າງແລ້ວກັບມາເບິ່ງຄືນລະມັນແມ່ນຫຍັງ. ສະນັ້ນ, ຕັ້ງໃຈຟັງຄຳອະທິບາຍ ຈົດ keyword ແລ້ວຈະເຮັດໃຫ້ເຮົາເຂົ້າໃຈໄດ້ຫຼາຍກ່ວາ.
ທີ່ຄິດໆມາຫົວຂໍ້ໃຫຍ່ໆກໍຈະຢູ່ປະມານນີ້ລະ ທີ່ຄິດໄດ້ ແລະ ຫວັງວ່າມັນຈະເປັນປະໂຫຍດໃຫ້ກັບນ້ອງໆທຸກຄົນທີ່ກຳລັງຈະກ້າວຈາກການເປັນນັກຮຽນໄປເປັນນັກສຶກສາ ວ່າເຮົາຈະຕ້ອງໄດ້ປ່ຽນແປງຫຍັງແນ່ ໂດຍສະເພາະ mindset ທີ່ເຮົາຄຸ້ນເຄີຍຈາກການເປັນນັກຮຽນ.