ຄຳຖາມສອບເສັງໂຄງການຊາວໜຸ່ມເດີນທະເລ ອາຊຽນ-ຍີ່ປຸ່ນ (SSEAYP) 2016
ບົດຄວາມນີ້ຈະເປັນແນວທາງສຳລັບໃຜທີ່ຈະສອບເສັງ ໂຄງການ ຊາວໜຸ່ມເດີນທະເລ ອາຊຽນ-ຍີ່ປຸ່ນ (SSEAYP) ໃນປີຕໍ່ໆໄປ. ຄຳຖາມທີ່ບອກນີ້ ແມ່ນໄດ້ຈາກປະສົບການທີ່ໄປເສັງໃນຮອບ ສອບເສັງຄັດເລືອກ ປີ 2016 ເຊິ່ງເປັນປີທຳອິດທີ່ກຳມະການສອບເສັງໄດ້ປ່ຽນຈາກການເສັງທີ່ເປັນ ພາສາລາວ ມາເປັນ ພາສາອັງກິດ ແລະ ປີຕໍ່ໆໄປກໍອາດຈະເປັນພາສາອັງກິດເລີຍກໍເປັນໄດ້.
ເນື້ອໃນຂອງຄຳຖາມໂດຍລວມທີ່ທ່ານຈະຕ້ອງເບິ່ງກໍຄືຄຳຖາມທີ່ກ່ຽວກັບຄວາມຮູ້ອ້ອມຕົວທີ່ເຮົາຄວນຮູ້(ຄວນຮູ້ແທ້ໆ)
- ຄະນະຊາວໜຸ່ມ ປະຊາຊົນ ປະຕິວັດລາວ (ການຈັດຕັ້ງ, ຊື່ການນຳ)
- ອາຊຽນ
- ໂຄງການ ຊາວໜູ່ມເດີນທະເລ ອາຊຽນ-ຍີ່ປຸ່ນ
- ປະເທດລາວ (ພູມສັນຖານ, ການເມືອງ-ການປົກຄອງ)
ສຳລັບຄຳຖາມສອບເສັງເພິ່ນຈະແບ່ງເປັນ 2 ພາກຖ້າຈື່ບໍ່ຜິດ ພາກທີ 1 ກໍຈະເປັນຄຳຖາມທີ່ກ່ຽວກັບພາຍໃນປະເທດເຮົາ ແລະ ພາກທີ 2 ຈະເປັນຄຳຖາມທີ່ກ່ຽວຂ້ອງກັບນອກປະເທດເຮົາ.
ສ່ວນໃນເລື່ອງຂອງຮູບແບບຄຳຖາມນັ້ນຈະເປັນອັດຕະໄນໝົດ, ບາງຄຳຖາມຈະເປັນການໃຫ້ຕື່ມຄຳໃນຊ່ອງຫວ່າງ, ແຕ່ສ່ວນຫຼາຍຈະເປັນຄຳຖາມໃຫ້ຕອບເລີຍ.
ໝາຍເຫດ: ຄຳຖາມຕໍ່ໄປນີ້ແມ່ນອາດຈະບໍ່ຖືກກັບຄຳຖາມທີ່ສອບເສັງແທ້ໆ 100 ເປີເຊັນ ແຕ່ເປັນຄຳຖາມທີ່ເຮົາຈື່ໄດ້ ແລະ ຄັດຈ້ອນສະຫຼຸບອອກມາພໍໃຫ້ເປັນແນວທາງໃຫ້ຜູ້ທີ່ສົນໃຈຈະເສັງໃນປີຕໍ່ໆໄປ, ແນະນຳໃຫ້ໄປອ່ານຂໍ້ມູນທີ່ກ່ຽວຂ້ອງຕື່ມ. ນອກນັ້ນ, ບາງຄຳຖາມອາດຈະມີຄຳຕອບໃຫ້ນຳ ແຕ່ບາງຄຳຖາມອາດຈະບໍ່ຖືກຕ້ອງ ກໍຕ້ອງຂໍອະໄພນຳ ຫຼື ທ່ານສາມາດທັກທ້ວງໂດຍການໃຫ້ຄວາມເຫັນຂ້າງລຸ່ມໄດ້ເລີຍ ແລ້ວເຮົາຈະແກ້ໄຂໃຫ້ໂດຍໄວທີສຸດ.
- ເລຂາທິການໃຫຍ່ ພັກປະຊາຊົນ ປະຕິວັດລາວ ຊື່ຫຍັງ?
- ປະທານປະເທດຂອງ ສ.ປ.ປ.ລາວ ຊື່ຫຍັງ?
- ນາຍົກລັດຖະມົນຕີຂອງ ສ.ປ.ປ.ລາວ ຊື່ຫຍັງ?
- ປະທານ ສະພາແຫ່ງຊາດຂອງ ສ.ປ.ປ.ລາວ ຊື່ຫຍັງ?
- ວັນສ້າງຕັ້ງ ພັກປະຊາຊົນ ປະຕິວັດລາວ ວັນ, ເດືອນ, ປີ ໃດ?
- ວັນສ້າງຕັ້ງ ກອງທັບ ປະຊາຊົນ ປະຕິວັດລາວ ວັນ, ເດືອນ, ປີ ໃດ?
- ວັນສ້າງຕັ້ງ ຄະນະຊາວ ໜຸ່ມປະຊາຊົນ ປະຕິວັດລາວ ວັນ, ເດືອນ, ປີໃດ?
- ວັນເກີດຂອງ ທ່ານ ໄກສອນ ພົມວິຫານ ວັນ, ເດືອນ, ປີ ໃດ?
- ວັນເກີດຂອງ ທ່ານ ສຸພານຸວົງ ວັນ, ເດືອນ, ປີໃດ?
- ເລຂາທິການ ຄະນະຊາວໜຸ່ມ ປະຊາຊົນ ປະຕິວັດລາວ ຊື່ຫຍັງ?
- ຮອງເລຂາທິການ ຄະນະຊາວໜຸ່ມ ປະຊາຊົນປະຕິ ວັດລາວມີຈັກຄົນ? ມີໃຜແນ່?
- ຄະນະຊາວໜຸ່ມ ປະຊາຊົນ ປະຕິວັດລາວ ມີຈັກກົມ ແລະ ຫ້ອງການ?
- ກອງປະຊຸມໃຫຍ່ຂອງ ຄະນະຊາວໜຸ່ມ ປະຊາຊົນ ປະຕິວັດລາວຄັ້ງທີ 7 ຈັດຂຶ້ນໃນ ວັນ,ເດືອນ, ປີ ໃດ?
- ກອງປະຊຸມໃຫຍ່ຂອງ ຄະນະ ຊາວໜຸ່ມປະຊາຊົນ ປະຕິວັດລາວຈັດຂຶ້ນຫ່າງກັນຈັກປີ?
- ຜູ້ທີ່ຈະເປັນຊາວໜຸ່ມໄດ້ຈະຕ້ອງມີອາຍຸແຕ່ຈັກປີຫາຈັກປີ?
- ຜູ້ທີ່ຈະເປັນເຍົາວະຊົນໄດ້ຈະຕ້ອງມີອາຍຸແຕ່ຈັກປີຫາຈັກປີ?
- ຜູ້ທີ່ຈະເປັນອານຸຊົນໄດ້ຈະຕ້ອງມີອາຍຸແຕ່ຈັກປີຫາຈັກປີ?
- ທຸງຊາດລາວມີຈັກສີ? ມີສີໃດແນ່?
- ປະເທດລາວມີຈັກຊົນເຜົ່າ?
- ປະເທດລາວມີຈັກລະດູ? ຄືລະດູໃດແນ່?
- ວັນສະຖາປະນາເປັນ ສ.ປ.ປ.ລາວ ແມ່ນວັນ, ເດືອນ, ປີ ໃດ?
- ຄະນະຊາວໜຸ່ມ ປະຊາຊົນ ປະຕິວັດລາວມີອົງການຈັດຕັ້ງຈັກຂັ້ນ? ຄືຂັ້ນໃດແນ່?
- ລັດຖະມົນຕີ ກະຊວງ ການຕ່າງປະເທດ ຊື່ຫຍັງ?
- ວິໄສທັດຂອງ ພັກ ແລະ ລັດ ທີ່ວາງໄວ້ແມ່ນແຕ່ປະຈຸບັນຮອດປີໃດ?
- ຍຸດທະສາດຂອງ ພັກ ແລະ ລັດ ໃນການທີ່ຈະເຮັດໃຫ້ ສ.ປ.ປ.ລາວ ຫຼຸດພົ້ນອອກຈາກການເປັນປະເທດດ້ອຍພັດທະນາແມ່ນແຕ່ປະຈຸບັນຮອດປີໃດ?
- ອາຊຽນປະກອບມີສະມາຊິກປະເທດໃດແນ່?
- ມີປະເທດໃດແນ່ທີ່ເປັນສະມາຊິກຕອນສ້າງຕັ້ງອາຊຽນທຳອິດ?
- ອາຊຽນສ້າງຕັ້ງຂຶ້ນ ວັນ, ເດືອນ, ປີ ໃດ?
- ປະເທດລາວເຂົ້າໄປສະມາຊິກຂອງອາຊຽນໃນ ວັນ, ເດືອນ, ປີ ໃດ?
- ຂຽນຊື່ເຕັມຂອງ ASEAN
- ຂຽນຊື່ເຕັມຂອງ SSEAYP
- ຂຽນຊື່ເຕັມຂອງ SIGA
- ຂຽນຊື່ເຕັມຂອງ LPRYU
- ປະເທດລາວມີຊາຍແດນຕິດກັບຈັກປະເທດ? ຄືປະເທດໃດແນ່?
- ປະເທດລາວເຂົ້າເປັນສະມາຊິກຂອງ SIGA ວັນ, ເດືອນ, ປີ ໃດ?
- ປະເທດລາວເຂົ້າເປັນສະມາຊິກຂອງ SSEAYP ວັນ, ເດືອນ, ປີ ໃດ?
- SSEAYP ສ້າງຕັ້ງຂຶ້ນປີໃດ?
- ປະເທດລາວຢູ່ໃນທະວີບໃດ?
- ເມືອງຫຼວງຂອງສິງກະໂປຊື່ຫຍັງ?
- ອາຊຽນມີສຳນັກງານໃຫ່ຍຕັ້ງຢູ່ໃສ?
- ASEAN+3 ໝາຍຄວາມວ່າ?
- 3 ຂາຂອງອາຊຽນມີຫຍັງແນ່?
- ປະເທດລາວຈະເປັນປະທານກອງປະຊຸມອາຊຽນຄັ້ງລ່າສຸດໃນເດືອນ, ປີ ໃດ?
- ປະເທດລາວເປັນປະທານກອງປະຊຸມອາຊຽນໃນປີໃດແນ່?
- ກອງປະຊຸມອາຊຽນຄັ້ງລ່າສຸດແມ່ນປະເທດໃດເປັນປະທານກອງປະຊຸມ?
ຄຳຖາມທັງໝົດຈະມີ 50 ຂໍ້, ຂໍ້ລະ 2 ຄະແນນ ໃຊ້ເວລາ 1 ຊົ່ວໂມງ.
ສະຫຼຸບຕາມຄວາມຄິດເຫັນສ່ວນຕົວ, ເນື້ອໃນບົດເສັງທີ່ເພິ່ນອອກນັ້ນມັນບໍ່ໄດ້ມີເນື້ອໃນທີ່ເຈາະຈົງຫຼາຍເກີນໄປ ສ່ວນຫຼາຍຈະມີເນື້ອໃນທີ່ຈະອອກແນວເປັນຄວາມຮູ້ອ້ອມຕົວທີ່ເຮົາຄວນຈະຮູ້ແທ້ໆ ໂດຍສະເພາະເມື່ອເຮົາຈະໄປແລກປ່ຽນວັດທະນາທຳກັບປະເທດອື່ນ ຫຼື ໄປແລກປ່ຽນຫົວຂໍ້ອື່ນໆກໍຕາມ ເຮົາສັງເກດເບິ່ງໄດ້ວ່າຄຳຖາມທີ່ອອກເສັງນັ້ນ ເດັກນ້ອຍທີ່ຈະເສັງນັກຮຽນເກັ່ງ ປ5 ວິຊາ ໂລກອ້ອມຕົວ ນັ້ນກະຕອບໄດ້ໝົດເປັນສ່ວນໃຫຍ່ ຍົກເວັ້ນຄຳຖາມທີ່ຈະເປັນແນວລົງເລິກບາງສ່ວນເຊັ່ນ: ກ່ຽວກັບອົງການຈັດຕັ້ງຂອງ ຄະນະຊາວໜຸ່ມ ປະຊາຊົນ ປະຕິວັດລາວ ແລະ ໂຄງການຊາວໜຸ່ມເດີນທະເລ ອາຊຽນ-ຍີ່ປຸ່ນ. ທັງນີ້ທັງນັ້ນ, ບາງຄຳຖາມທີ່ເຮົາຄາດວ່າມັນຈະອອກແຕ່ກໍບໍ່ໄດ້ອອກກໍມີເຊັ່ນ: ຍຸດທະສາດຂອງ ຄະນະຊາວໜຸ່ມ ປະຊາຊົນ ປະຕິວັດລາວ 4 ບຸກທະລຸ, 2 ສາມັກຄີ 3 ດີ 4 ພັດທະນາ, ຄຳຂັວນຂອງ ທ່ານ ໄກສອນ ພົມວິຫານ ຕໍ່ກັບຊາວໜຸ່ມວ່າ: “ຊາວໜຸ່ມ ຈົ່ງເປັນດັ່ງນົກອິນຊີ ທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງໄປດັ່ງສິນໄຊ” ປະມານນີ້ຕິ ຖ້າຜິດທັກທວງກັນໄດ້, ເນື້ອໃນ ແລະ ວິໃສທັດຂອງ ກອງປະຊຸມຂອງ ຄຊປປລ ຄັ້ງລ່າສຸດ, ເນື້ອໃນ ແລະ ວິໄສທັດຂອງ ພັກ ແລະ ລັດ ແລະ ນະໂຍບາຍຕ່າງຂອງອາຊຽນ. ສ່ວນຈຳພວກນີ້ຖ້າອອກນິກະຄົງສິບໍ່ລອດ ເພາະຂະໜາດພາສາລາວກະຍັງພໍແຮງລະ ໃຫ້ຕອບເປັນພາສາອັງກິດອີກ. ສຸດທ້າຍ, ຫວັງວ່າບົດຄວາມນີ້ຈະເປັນປະໂຫຍດສຳລັບໃຜທີ່ຈະກຽມສອບເສັງໂຄງການ ຊາວໜຸ່ມເດີນທະເລ ອາຊຽນ-ຍີ່ປຸ່ນ.
