MacBook Pro with Retina display ອັບເດດສະເປັກໃໝ່ໄວກ່ວາເກົ່າ
Apple ໄດ້ອັບເດດສະເປັກໃຫ້ກັບ MacBook Pro with Retina display ທຸກລຸ້ນທັງຈໍ 13 ນິ້ວ ແລະ 15 ນິ້ວ. ການອັບເດດຄັ້ງນີ້ແມ່ນເພີ່ມຄວາມໄວໃຫ້ກັບໂຕ MacBook ເພື່ອໃຫ້ທັນກັບຄວາມໄວໃນປັດຈຸບັນ ແລະ ອີກທັງສືບເນື່ອງມາຈາກວ່າອາທິດຜ່ານມາບໍ່ດົນນີ້ Apple ໄດ້ປ່ອຍລະບົບປະຕິບັດການ Yosemite Beta ໃຫ້ໃຊ້ກັນ ມັນອາດຈະເປັນການອັບເດດເພື່ອຮອງຮັບລະບົບປະຕິບັດການໃໝ່ໂຕນີ້ກໍອາດຈະເປັນໄປໄດ້.
ໃນການອັບເດດນີ້ເຮົາສາມາດເຫັນໄດ້ວ່າໄດ້ເນັ້ນຄວາມໄວເປັນຫຼັກເຊັ່ນ: ອັບເດດໜ່ວຍປະມວນຜົນທຸກລຸ້ນເປັນ Intel Core i5 ແລະ i7 Haswell ທີ່ປະຢັດພະລັງງານຍິ່ງຂຶ້ນ. ໃນສ່ວນຂອງ MacBook Pro with Retina display ໜ້າຈໍ 13 ນິ້ວນັ້ນສະເປັກຕ່ຳສຸດແມ່ນໃຊ້ໜ່ວຍປະມວນຜົນ Intel Core i5 2.6GHz dual-core ແລະ RAM 8 GB ຈາກໂຕເກົ່າທີໃຊ້ໜ່ວຍປະມວນຜົນ Intel Core i5 2.4GHz dual-core ແລະ RAM 4 GB. ຕາມມາດວ້ຍ MacBook Pro with Retina display ໜ້າຈໍ 15 ນິ້ວນັ້ນສະເປັກຕ່ຳສຸດແມ່ນໃຊ້ໜ່ວຍປະມວນຜົນ Intel Core i7 2.2GHz dual-core ແລະ RAM 16 GB ຈາກໂຕເກົ່າທີໃຊ້ໜ່ວຍປະມວນຜົນ Intel Core i7 2.0GHz dual-core ແລະ RAM 8 GB.
ສຳລັບລາຄານັ້ນແມ່ນບໍ່ປ່ຽນແປງຈາກໂຕເກົ່າຄື: ລຸ້ນໜ້າຈໍ 13 ນິ້ວລາຄາເລີ່ມຕົ້ນແມ່ນ $1,299 ແລະ ລຸ້ນ 15 ນິ້ວແມ່ນ $1,999. ກົງກັນຂ້າມກັບລຸ້ນແພງສຸດຂອງໂຕ 15 ນິ້ວນັ້ນແມ່ນຫຼຸດລາຄາລົງ $100 ຈາກ $2,599 ເຫຼືອ $2,499.
