ທຳຄວາມຮູ້ຈັກກັບການແຂ່ງຂັນ Google Online Marketing Challenge
ຫຼາຍຄົນຄົງຈະໃຫ້ຄວາມສົນໃຈກັບການແຂ່ງຂັນ Google Online Marketing Challenge ແຕ່ບາງຄົນກະຍັງບໍ່ທັນຮູ້ຈັກວ່າມັນແມ່ນຫຍັງ ເຮົາຈະພາມາທຳຄວາມຮູ້ຈັກກັນກ່ອນວ່າມັນແມ່ນການແຂ່ງຂັນແບບໃດ?
ການແຂ່ງຂັນ Google Online Marketing Challenge ແມ່ນຫຍັງ?
Google Online Marketing Challenge ຫຼື ການແຂ່ງຂັນການຕະຫຼາດອອນລາຍ Google ແມ່ນການແຂ່ງຂັນທີ່ແຕກຕ່າງຈາກການແຂ່ງຂັນອື່ນໆທີເຮົາເຫັນທົ່ວໄປ ການແຂ່ງຂັນນີ້ແມ່ນສຳລັບນັກສຶກສາໂດຍແນ່ໃສ່ເພື່ອຢາກໃຫ້ນັກສຶກສາໄດ້ມີປະສົບການ ແລະ ສ້າງ, ຮຽນຮູ້ການຕະຫຼາດອອນລາຍໂດຍໃຊ້ຜະລິດຕະພັນຂອງ Google ເຊັ່ນ: Google+ ແລະ Google AdWords. ປັດຈຸບັນມີນັກສຶກສາ ແລະ ອາຈານເຂົ້າຮ່ວມການແຂ່ງຂັນນີ້ຫຼາຍກ່ວາ 65.000 ຄົນ ຈາກເກືອບ 100 ປະເທດທົ່ວໂລກ.
ການແຂ່ງຂັນນີ້ມີລັກສະນະແນວໃດ?
ນັກສຶກສາຈະຕ້ອງໄດ້ສ້າງ, ຈັດການ ແລະ ເຮັດໃຫ້ເກີດຜົນສູງສຸດ(Optimize) ໃນການເຮັດໂຄສະນາອອນລາຍສຳລັບທຸລະກິດໃດໜຶ່ງ ຫຼື ອົງການບໍ່ສະແຫວງຫາຜົນກຳໄລ ເຊິ່ງວ່າສອງອັນນີ້ແມ່ນຂຶ້ນກັບເຮົາວ່າເຮົາຈະເລືອກອັນໃດ. ໄລຍະເວລາການເຮັດການໂຄສະນາອອນລາຍແມ່ນ 3 ອາທິດໂດຍໃຊ້ເງິນທຶນ 250 ໂດລາສະຫະລັດທີ່ Google ມອບໃຫ້.
ໃຜແນ່ທີສາມາດເຂົ້າຮ່ວມການແຂ່ງຂັນໄດ້?
ທຸກໆນັກສຶກສາມາດເຂົ້າຮ່ວມໄດ້ ໂດຍບໍ່ຈຳແຍກວ່າຈະຮຽນຢູ່ຄະນະໃດກໍຕາມ, ສ່ວນອາຈານແນະນຳແມ່ນຈະຕ້ອງເປັນອາຈານທີກຳລັງສອນຢູ່ສະຖາບັນໃດໜຶ່ງຈຶ່ງຈະສາມາດສະໝັກເປັນອາຈານແນະນຳຂອງກຸ່ມນັກສຶກສາໄດ້.
Google ໃຫ້ຫຍັງແນ່ໃນການແຂ່ງຂັນນີ້?
ແຕ່ລະທີມຈະໄດ້ຮັບຄູ່ມື, ການໃຫ້ຄຳປຶກສາກັບຜະລິດຕະພັນ AdWords ແລະ ເງິນທຶນ AdWords ຈຳນວນ 250 ໂດລາ. ນອກນັ້ນຍັງມີຫ້ອງສອນອອນລາຍກ່ຽວກັບຜູ້ທີຍັງບໍ່ທັນຮູ້ຈັກກັບຜະລິດຕະພັນຂອງ AdWords ໃນເວັບໄຊ.
ເປັນຫຍັງຈຶ່ງມີອາຈານ ແລະ ນັກສຶກສາເຂົ້າຮ່ວມນຳກັນ?
ອາຈານເຂົ້າຮ່ວມນຳເພື່ອວ່າຈະໄດ້ມີໂອກາດໃນການສ້າງທິດສະດີການຕະຫຼາດໃຫ້ມີຄວາມສອດຄອງກັນຍິ່ງຂຶ້ນ(ກໍລະນີທິດສະດີກັບໂຕຈິງ) ສຳລັບນັກຮຽນຜ່ານປະສົບການຕົວຈິງ.
ສຳລັບນັກສຶກສາຈະໄດ້ມີໂອກາດຮຽນຮູ້ຜົນກະທົບໃນຊີວິດຕົວຈິງ ແລະ ສ້າງຄວາມສຳພັນກັບຄູ່ຮ່ວມງານຂອງພວກເຂົາ ໂດຍໄດ້ໃຊ້ເງິນຕົວຈິງໃນການເຮັດການໂຄສະນາອອນລາຍ.
ຂອງລາງວັນມີຫຍັງແນ່(ສຳລັບຜູ້ຊະນະ)
ຂອງລາງວັນຈະໄດ້ແມ່ນຈະແບ່ງອອກເປັນ 3 ປະເພດຄື: ທຸລະກິດ, ຜົນກະທົບຈາກສັງຄົມ ແລະ ການຕະຫຼາດໃນສື່ສັງຄົມອອນລາຍ. ຜູ້ຊະນະຈາກທຸກໆປະເພດຈະໄດ້ຮັບອຸປະກອນເອເລັກໂຕນິກ, ຂອງແຈກຈາກ Google ແລະ ໃບກຽດຕິຄຸນ. ສຳລັບຜູ້ຊະນະຂັ້ນໂລກຂອງປະເພດທຸລະກິດຈະໄດ້ຮັບສິດໄປທັດສະນະທີ Googleplex ໃນ Mountain View ທີ ສະຫະລັດອາເມລິກາ ແລະ ຂັ້ນທ້ອງຖິ່ນຈະໄດ້ໄປທັດສະນະບ່ອນເຮັດວຽກຂອງ Google ໃນທ້ອງຖິ່ນຂອງຕົນ.
ສຳລັບໃຜທີສົນໃຈສາມາດເຂົ້າໄປອ່ານລາຍລະອຽດເພີ່ມຕື່ມໄດ້ທີ
Google Online Marketing Challenge
ຍັງມີຕໍ່ເດີ້! ກະລຸນນາຕິດຕາມຂໍ້ມູນ ແລະ ລາຍລະອຽດອື່ນກ່ຽວກັບການແຂ່ງຂັນ Google Online Marketing 2015 ທີຈະມາໃນໄວໆນີ້ໂດຍຜ່ານເວັບໄຊນີ້.
