ການອ່ານປຶ້ມບົດຮຽນເປັນຫຍັງທີ່ໜ້າເບື່ອ ແລະ ສ່ວນຫຼາຍອ່ານແລ້ວຮູ້ສຶກມັນບໍ່ເຂົ້າໃຈເລີຍ ຕົວຢ່າງ ອ່ານປຶ້ມທີ່ເປັນທິດສະດີ ແຮງບໍ່ຮູ້ເລື່ອງຫຍັງເລີຍ, ແຕ່ຖ້າອ່ານປຶ້ມຕຳລາທີ່ເປັນປຶ້ມເລກນິ ພໍວ່າໄຄແນ່. ແຕ່ວ່າເຈົ້າຂອງບລອກ ໄດ້ໄປຮູ້ຈັກເຕັກນິກ SQ3R ເປັນເຕັກນິກທີ່ໃຊ້ໃນການອ່ານປຶ້ມຕຳລາໃຫ້ມີປະສິດທິພາບ.
ເຕັກນິກນີ້ (SQ3R) ຄິດຄົ້ນໂດຍ ທ່ານ Francis Pleasant Robinson ທີ່ຂຽນໄວ້ໃນປຶ້ມ Effective Study ໃນປີ 1946. ເຕັກນີ້ແມ່ນຖືກຄິດຄົ້ນຂຶ້ນເພື່ອໃຫ້ ນັກສຶກສາ ອ່ານປຶ້ມຕຳລາ ໃຫ້ມີປະສິດທິພາບສູງສຸດ ໂດຍຈະແບ່ງອອກເປັນ 5 ຂັ້ນຕອນຄື: Survey, Question, Read, Recite ແລະ Review. ເຮົາຈະມາເບິ່ງກັນວ່າແຕ່ລະຂັ້ນຕອນມີລາຍລະອຽດແບບໃດແນ່.
Survey (ສຳຫລວດພາບລວມ)
ຂັ້ນຕອນທຳອິດ ເຮົາຈະຕ້ອງສຳຫຼວດກ່ອນ, ອ່ານແບບ skrim ກະຄືອ່ານແບບຜ່ານໆ ໂດຍບໍ່ຕ້ອງຈຳເປັນຕ້ອງຈື່ເນື້ອໃນຫຍັງທັງໝົດ ແລະ ບໍ່ລົງເລິກເຖິງເນື້ອຫາໃນບົດທີ່ເຮົາອ່ານເທື່ອ ເຮົາມີພຽງແຕ່ວ່າອ່ານແຕ່ໂຕທີ່ມັນເປັນຫົວຂໍ້ໃຫຍ່, ຫົວຂໍ້ຍ່ອຍ ຂອງມັນເທົ່ານັ້ນ. ການເຮັດແບບນີຈະເຮັດໃຫ້ເຮົາເຂົ້າໃຈວ່າ ສິ່ງທີ່ກຳລັງຈະອ່ານຢູ່ນັ້ນ ມີພາບລວມປະມານໃດ. ເຮົາຈະໄດ້ກໍຄື ໄອເດຍຄ້າວໆຂອງບົດຮຽນນັ້ນໆວ່າມັນຈະເວົ້າຫຍັງແນ່ ມີຫຍັງທີ່ເປັນຕາສົນໃຈບໍ່, ຂັ້ນຕອນນີ້ມັນກໍຈະຄ້າຍໆຕອນທີ່ເຮົາໄປຟັງບົດນຳສະເໜີຂອງກະເຈົ້າຫັ້ນແຫຼະ ບາງເທື່ອ ເຂົາອາດຈະຍົກສະໄລ້ໜຶ່ງຂຶ້ນມາ ທີ່ເປັນສະໄລ້ຫົວຂໍ້ ວ່າໃນບົດນຳສະເໜີນັ້ນ ເຂົາຈະເວົ້າຈັກຫົວຂໍ້ ແລະ ມີຫົວຂໍ້ໃດແນ່, ສິ່ງນີ້ຈະເຮັດໃຫ້ຜູ່ທີ່ເປັນຄົນຟັງ ຫຼື ໃນຖານະນີ້ແມ່ນຜູ່ທີ່ອ່ານຮູ້ໄດ້ວ່າເຮົາກຳລັງຈະອ່ານຫຍັງຢູ່.
ຈາກປະສົບການໂຕຈິງເຫັນວ່າ ຂັ້ນຕອນນີ້ ມີຜົນຫຼາຍ ເພາະແຕ່ກ່ອນແມ່ນ ເຈົ້າຂອງບລອກ ຈະອ່ານຕັ້ງແຕ່ຫົວຂໍ້ທຳອິດໄປເລີຍໂດຍບໍ່ຮູ້ວ່າເນື້ອໃນຕໍ່ໄປມນັຈະເວົ້າຫຍັງແນ່ ອ່ານໄປແບບຄືມັນເປັນປຶ້ມນິຍາຍອີຫຍັງຈັກຢ່າງນິລະ ແບບວ່າອ່ານຂ້າມໄປຕອນສຸດທ້າຍເລີຍບໍ່ໄດ້ ຮະໆ. ແຕ່ໃຫ້ເຂົ້າໃຈວ່າ ເຮົາກຳລັງອ່ານປຶ້ມຕຳລາ ບໍ່ແມ່ນປຶ້ມນິຍາຍ ທີ່ຈະອ່ານຕັ້ງແຕ່ຕົ້ນຈົນຈົບໂດຍທີ່ຈະຂ້າມໄປວັກໜຶ່ງບໍ່ໄດ້, ປຶ້ມຕຳລາເຮົາສາມາດຂ້າມໄປໂຕທີ່ສຳຄັນເລີຍກະໄດ້.
Question (ຕັ້ງຄຳຖາມ)
ຂັ້ນຕອນທີ່ ສອງ ກໍ່ຄືຂັ້ນຕອນ ການຕັ້ງຄຳຖາມກັບຕົນເອງ(ເອີ້ຍ, ບໍ່ແມ່ນລະ) ຕັ້ງຄຳຖາມໃຫ້ກັບຫົວຂໍ້ໃຫຍ່, ຫົວຂໍ້ຍ່ອຍ. ອາດຈະເປັນປະມານວ່າ: ຄວາມເປັນມາຂອງຫົວຂໍ້ທີ່ເຮົາອ່ານມາຈາກໃສ?, ທິດສະດີໂຕນີ້ແມ່ນຫຍັງ? ຫລື ເຮົາຈະອີງຕາມ who, why, how ກໍໄດ້ ເຊິ່ງຄຳຖາມເຫລົ່ານີ້ເປັນຄຳຖາມພື້ນຖານ ທີ່ຈະຊ່ວຍໃຫ້ເຮົາ ເຂົ້າໃຈຈຸດປະສົງຂອງຜູ້ຂຽນໄດ້ໄວຂຶ້ນ ແລະ ຊ່ວຍໃນການຈົດ (take note) ຈຸດທີ່ສຳຄັນ ໄວ້ຕອນທີ່ເຮົາກັບມາເບິ່ງຄືນ.
Read (ອ່ານຫາຂໍ້ມູນເພີ່ມ)
ຂັ້ນຕອນທີ່ ສາມ ກໍ່ຄືການອ່ານ ອ່ານເພື່ອລົງເລິກເອົາລາຍລະອຽດ (detail) ໂດຍການອ່ານຈະອ່ານອີງຕາມຂໍ້ມູນທີ່ເຮົາໄດ້ຈາກຂັ້ນຕອນທີ 1 ແລະ 2 (S ແລະ Q) ອ່ານເພື່ອເພື່ອຫາຄຳຕອບ ຂອງຄຳຖາມທີ່ໄດ້ຈາກຂັ້ນຕອນກ່ອນໜ້ານີ້ ພ້ອມກັນນັ້ນກໍ note ເອົາ ຄຳຖາມທີ່ pop up ຂຶ້ນມາຂະນະທີ່ເຮົາອ່ານນຳ.
Recite (ທວນຄືນຄວາມເຂົ້າໃຈ)
ຫຼັງຈາກທີ່ເຮົາອ່ານແລ້ວ ກໍຈະລຶ້ມຄືນສິ່ງທີ່ເຮົາອ່ານມາໃນແບບທີ່ເຮົາເຂົ້າໃຈ ຖ້າຈະເວົ້າໃນອີກແບບໜຶ່ງກໍຄືການທວນຄືນດ້ວຍການທີ່ເຮົາເອົາທີ່ສິ່ງທີ່ອ່ານມາ ສອນໝູ່ ຫຼື ໃນແບບທີ່ເຮົາເຂົ້າໃຈ ໂດຍໃຊ້ປະໂຫຍກຄຳເວົ້າໃນແບບຂອງເຮົາ. ພະຍາຍາມຈື່ຈຸດທີ່ສຳຄັນເຊັ່ນ: ຫົວຂໍ້ໃຫ່ຍ ແລະ ຍ່ອຍ. ການທວນຄືນແບບນີ້ຄວນຈະເຮັດໃນການແບບການຂຽນດີກວ່າ ເພາະມັນຈະຊື່ໃນການຈື່ໄລຍະຍາວ.
ລວມເຖິງການທວນຄືນໃນຂັ້ນຕອນນີ້ ແມ່ນການຣີວິວອີກເທື່ອໜຶ່ງວ່າ ສະຫລຸບແລ້ວຈຸດໃດທີ່ເປັນ ປະເດັນຫລັກຂອງຫົວຂໍ້ນັ້ນໆ ລວມເຖິງຄຳຖາມທີ່ເຮົາມີໃນຕອນທີ່ເຮົາອ່ານ ທີ່ບົດຄວາມດັ່ງກ່າວຍັງບໍ່ມີ ເຊິ່ງວ່າເຮົາສາມາດໄປຫາຂໍ້ມູນນັ້ນໄດ້ເພີ່ມຕື່ມຈາກບ່ອນອື່ນ ຫລື ຖາມອາຈານ.
Review (ທວນຄືນ)
ຂັ້ນຕອນສຸດ້ທານກະຄື ການທວນຄືນ ແຕ່ການທວນຄືນໃນຂັ້ນຕອນນີ້ຈະແຕກຕ່າງຈາກການທວນຄືນໃນຂັ້ນຕອນທີ່ຜ່ານມາ, ໃນຂັ້ນຕອນນີ້ເຮົາກໍຈະມາທົດສອບເບິ່ງວ່າເຮົາຈື່ສິ່ງທີ່ເຮົາອ່ານມາໄດ້ຫຼາຍສ່ຳໃດ ໂດຍການຕອບຄຳຖາມຈາກຫົວຂໍ້ໃຫຍ່ ແລະ ຍ່ອຍ. ຕາມຄວາມເປັນຈິງແລ້ວ ຂັ້ນຕອນນີ້ ສ່ວນໃຫຍ່ມັນກະຈະຢູ່ປົນກັບຂັ້ນຕອນ R(read) ແລະ R(recite) ຢູ່ແລ້ວ.
