5 ຂໍ້ຄິດກ່ອນການເຮັດໂຄສະນາ
ການທີ່ຈະສ້າງໂຄສະນາໃດໜຶ່ງໃຫ້ກັບໂຕສິນຄ້າຂອງເຮົາໃຫ້ມັນມີຄວາມສົນໃຈ ແລະ ເຮັດໃຫ້ຜູ່ທີ່ໄດ້ເບິ່ງໄດ້ຟັງນັ້ນຢາກຊື້ສິນຄ້າເຮົາເປັນສິ່ງທີ່ທ້າທາຍຫຼາຍສຳລັບນັກການຕະຫຼາດ. ກ່ອນທີ່ຈະມາເປັນໂຄສະນາໃຫ້ເຮົາໄດ້ມາເບິ່ງກັນນັ້ນຮູ້ບໍ່ວ່າເຂົາຜູ່ທີ່ຄິດໂຄສະນາໄດ້ນັ້ນຄວນຄຳນຶ່ງເຖິງຫຍັງແດ່?
ບົດຄວາມນີ້ເຮົາຈະມາເວົ້າກ່ຽວກັບພື້ນຖານການສ້າງໂຄສະນາ ສຳລັບມືໃໝ່ຜູ່ທີ່ສົນໃຈເລື່ອງການຕະຫຼາດ ຫຼື ສື່ຕ່າງໆ. ເຮົາຈະມາເບິ່ງກັນວ່າເຮົາຄວນຄຳນຶ່ງເຖິງຫຍັງເມື່ອເຮົາຈະສ້າງໂຄສະນະໃດໜຶ່ງ
#Stopping power
ທຳອິດເລີຍເຮົາກໍຈະຕ້ອງຕັ້ງຄຳຖາມວ່າ: ມັນຈະສາມາດຢຸດຜູ່ເບິ່ງໄດ້ບໍ່? ເຮົາຈະຕ້ອງເບິ່ງວ່າໂຄສະນາຂອງເຮົານັ້ນມັນຈະຢຸດຜູ່ເບິ່ງຈາກສິ່ງທີ່ເຂົາກຳລັງເຮັດຢູ່ນັ້ນໃຫ້ມາສົນໃຈໂຄສະນາຂອງເຮົາໄດ້ບໍ່?
ການທີ່ຈະເຮັດໃຫ້ຄົນຫັນມາສົນໃຈກັບໂຕສິນຄ້າທີ່ເຮົາໂຄສະນະນັ້ນເປັນສິ່ງທີ່ສຳຄັນອັນດັບຕົ້ນໆເລີຍ ເຮົາຈະຕ້ອງເບິ່ງຄືນວ່າສິນຄ້າຂອງເຮົານັ້ນມັນມີຈຸດເດັ່ນໂຕໃດທີ່ເຮົາຄິດວ່າຈະເຮັດໃຫ້ຄົນຫຼຽວມາເບິ່ງໂຄສະນາຂອງເຮົາ. ເຮົາຈະຕ້ອງຄິດອີກວ່າເຮົາຈະມີວິທີການ, ຄວາມຄິດແນວໃດທີ່ຈະເຮັດໃຫ້ໂຄສະນາຂອງເຮົານັ້ນໄປເຕະຕາຄົນໃຫ້ໄດ້.
#Credibility
ຕໍ່ມາເຮົາກໍຈະມາເບິ່ງວ່າໂຕໂຄສະນາຂອງເຮົານັ້ນ ສ້າງຄວາມເຊື່ອໃຫ້ຜູ່ເບິ່ງໄດ້ບໍ່? ແນ່ນອນວ່າເມື່ອເຮົາຈະຂາຍສິນຄ້າໃດໜຶ່ງ ເຮົາກໍຈະຕ້ອງບອກຄຸນປະໂຫຍດ, ຄວາມສາມາດ, ສັບພະຄຸນຂອງມັນໃຫ້ຜູ່ເບິ່ງ ແລ້ວໃຫ້ຜູ່ເບິ່ງຕັດສິນ. ເຮົາບໍ່ຄວນຈະໂຄສະນາເກີນຈິງເກີນໄປ, ເຮົາຄວນອ້າງຄຸນປະໂຫຍດຂອງໂຕສິນຄ້າເຮົາໃຫ້ມີຄວາມໃກ້ຄຽງກັບຄຸນປະໂຫຍດທີ່ເຂົາຈະໄດ້ຮັບໃນໂລກຄວາມເປັນຈິງ, ເຮົາຈະຕ້ອງຄິດວ່າເຮົາຈະເຮັດແນວໃດໃຫ້ເຂົາເຊື່ອໃນໂຕສິນຄ້າເຮົາ.
#Originality
ໂຄສະນາຂອງເຮົາ ແຕກຕ່າງ, ດັ້ງເດີມ, ແປກໃໝ່ ຫຼືບໍ່? ເຮົາຈະຕ້ອງເບິ່ງວ່າໂຄສະນາຂອງເຮົາທີ່ເຮົານຳສະເໜີນັ້ນມັນເປັນແນວໃດ? ຄວາມຄິດໃນການນຳສະເໜີເປັນສິ່ງແປກໃໝ່ ຫຼື ມັນຄືກັບໂຄສະນາທົ່ວໆໄປ.
#Relevance
ກ່ອນເຮົາຈະຜະລິດສິນຄ້າໃດໜຶ່ງເຮົາກໍຈະຕ້ອງຄິດເບິ່ງວ່າສິນຄ້າຂອງເຮົາເມື່ອຜະລິດອອກມາແລ້ວມັນຈະເປັນທີ່ຕ້ອງການຂອງຄົນໃນສັງຄົມບໍ່, ມັນມີຄວາມກ່ຽວພັນກັບຜູ່ໃຊ້ແນວໃດ. ການໂຄສະນາກໍຄືກັນ ເຮົາກໍຈະຕ້ອງເບິ່ງວ່າໂຄສະນາຂອງເຮົານັ້ນສິ່ງທີ່ເຮົາຈະສື່ເຖິງນັ້ນມັນກ່ຽວພັນກັບໂຕຜູ່ເບິ່ງບໍ່. ຖ້າເຮົາໂຄສະນາທີ່ມັນບໍ່ກ່ຽວພັນກັບຜູ່ເບິ່ງແລ້ວເຂົາຈະສົນໃຈໂຄສະນາຂອງເຮົາບໍ່ ຫວັງວ່າເຂົາຄົງຈະບໍ່ສົນໃຈແນ່ນອນ.
#Empathy
ໂຄສະນາຂອງເຮົານັ້ນມັນສາມາດເຂົ້າເຖິງຄວາມຄິດຂອງໂຕຜູ່ເບິ່ງໄດ້ບໍ່? ໂຄສະນາຂອງເຮົານັ້ນຈະຕ້ອງເບິ່ງວ່າເມື່ອຜູ່ເບິ່ງໄດ້ເບິ່ງແລ້ວເຂົາຈະຄິດແນວໃດ? ໂຄສະນາຂອງເຮົານັ້ນສາມາດເຂົ້າເຖິງຄວາມຮູ້ສຶກຂອງເຂົາໄດ້ບໍ່? ສາມາດເຮັດໃຫ້ເຂົາເບິີງແລ້ວເຂົາຈະເຂົ້າເຖິງໂຕໂຄສະນາຂອງເຮົາໄດ້ບໍ່ ວ່າເຮົາຈະສື່ເຖິງຫຍັງ?
